LAOAG CITY – Dimmawat ti dispensar ni Ms. Angel Lao, ti mangidadaulo iti City Tourism Office maipanggep iti nagbalin a problema iti pannakaiparuk-at ti resulta iti Inabel Fashion Show a naiyuswat iti napalabas nga aldaw kas paset ti pannakarambak ti maika-59 a tawen a Charter Day ditoy siudad ti Laoag.
Segun kenkuana, apaman a nalpas ti nasao nga event ket adda ti immasideg kenkuana a nangibaga nga adda ti biddot iti nairuar a resulta rason a dagusna daytoy a kinorehir babaen kadagiti adda iti babaenna iti opisina.
Gapu iti daytoy, inpalgakna a nakigtot isuna idi naammoanna daytoy a banag isu nga insigidana met a kinsarita ti maysa kadagiti adda iti babaenna a nadutukan iti tabulation wenno ti panangala dagiti datos wenno iskor dagiti nagbibinnalubal iti kompetision.
Inlawlawagna a basar iti tabulation ket adda ti napasamak a problema no sadino ket nagbalin a zero dagiti iskor dagiti nakipaset iti event a naapektaran iti total score dagiti maseknan.
Inbatadna a nagdesision daytoy a paayaban dagiti amin a designers tapno mapagsasaritaan a naimbag ti nasao a pasamak banag nga inawat met dagiti maseknan ti palawagna.
Innayonna a no ania ti nadakamat a premio ket dagiti nangabak ket isu met laeng ti ipaayda kadakuada.
Kabayatanna, sakbay nga inrakurak ti City Tourism Officer iti pudno a napasamak ket naluksaw ni Mr. George Villasan Jr., maysa kadagiti designer a nakipaset iti Inabel Fashion Show ket saanna a maawat ti nagbalin a resulta ti nasao a kompetision.
Kunana a maluksaw daytoy gapu ta saan a nakastrek iti Top 5 iti baet nga isuna ket nakaawat ti People’s Choice Award ken ammona met ti kabaelanna.
Nupay kasta, inbatadna nga idi napaayaban isudan ket ditoy a naipakaammo kadakuada ti pudno a napasamak iti resulta ti Inabel Fashion Show.
Innayonna a naapresiarna ti panangadmitir ni Lao iti nasao a biddot ken inakseptarda ti palawag ken panagpadispensarna kadakuada.
