LAOAG CITY – Naarestar ti maysa a mannalon iti naisayangkat a search warrant operation iti Barangay Barbar, Pinili, Ilocos Norte.
Nabigbig ti suspek a ni Jefferson Tira y Baligad, 48, naasawaan, mannalon ken residente met laeng iti nasao a barangay.
Iti eksklusibo nga interview ti Bombo Radyo Laoag ken ni Police Major Jephre Taccad, chief of police iti ili ti Pinili, inbatad na a nakumpiskar da iti balay ni Tira ti dua nga M16 rifle, dua a magazine ken ado a bala para iti cal. 5.56mm.
Inlawlawag ni Taccad nga awan ti aniaman a record ni Tira malaksid laeng ti impormasyon a dumandanun iti opisina da a maipagarop a panagpappaputok ti paltog ti suspek iti nasao a lugar.
Innayon ti opisyal nga ti lisensya dagiti paltog ni Tira.
Iti agdama, nagtalinaed ti suspek iti kustodyar ti PNP-Pinili ken maisagsaganan ti reklamo a maipila kontra kenkuana.
Kabayatanna, malaksid ken ni Tira, naisayangkatan pay ti search operation dagiti dua a kabagyan na nga isuda Michael Rosaro y Vermudez, 36, naasawaan ken ni Elpidio Rosaro y Tira, 63, agpada a residente iti nasao a barangay ngem negatibo ti resulta na.
