LAOAG CITY – Kalikagum ni Mayor Richard Degala iti ili ti Vintar a sapasap amin a maikkan ti tulong dagiti residente iti nasao nga ili.
Segun kenkuana, daytoy ket kalpasan nga amin met nga umili ket naapektaran iti iduduprak ti Bagyo Julian rason a nasken laeng a sapasap ti pannakaibunong ti tulong kadakuada.
Inbatadna a kitaen ti lokal a gobierno no tunggal pamilia wenno household iti pannakaibunong ti relief packs gapu ta nakadepende ti kaadu dagitoy.
Inlawlawagna a nasaysayaat no sapasap gapu ta uray bassit no amin ket maipaayan ti tulong ket awan ti tumaod a reklamo wenno problema dagiti umili.
Innayonna iti panawen ti didigra ket kasapulan ti panagkaykaysa tapno maikkan amin dagiti umili uray sangkabassit laeng a tulong.
