LAOAG CITY – Inbatad ni Mayor Edward Quilala iti ili ti Currimao a saan a kina-irresponsable ti panangawat na iti maysa a pulis a dati a nagpositibo ti covid-19 iti ili da.
Sungbat daytoy ti mayor kalpasan nga adda dagiti nangawag kenkuana nga irresponsable gapu ta inpalubos na nga iti Mothering Center iti nasao nga ili a naiquarantine ti nasao a pulis.
Inlawlawag ni Quilala a sinurot da amin a protocol ken nadalos ti konsensya na iti nagbalin a desisyon na.
Innayon na a ti Mothering Center ken naidesignar kas pagyanan dagiti possible a maapektaran ti virus.
Inkalintegan pay ni Quilala a dagiti lugar nga indesignar da a quarantine area ket saan da laeng nga ideya no di ket karaman pay iti gobierno probinsyal.
Kas pammaneknek, inpakaammo ti mayor a nangipatulod pay ni Vice Governor Cecille Araneta-Marcos ti bitamina a mangpapigsa ti immune system, malaksid pay kadagiti nagipatulod ti prutas para iti nasao a pulis a naka-quarantine iti agdama iti Mothering Center iti nasao nga ili.
Ti nasao a pulis ket taga Paoay ngem naka-assign iti PNP-Currimao.
Kuna ni Quilala a nakisarita daytoy nga iti Mothering Center ti pagyanan na imbes nga agawid iti balay da tapno masigurado ti kinatalged ti pamilya na kangrunaan na ket babassit pay dagiti annak ti pulis.
Inpasigurado pay ni Mayor Quilala a naiget ti koordinasyon ti Municipal Health Office ken ti Mariano Marcos Memorial Hospital and Medical Center iti ciudad ti Batac para iti agtultuloy a pannakamonitor ti nasao a pulis.
