LAOAG CITY – Natay ti agtawen ti 85 a baket a Pilipino idiay Kalihi, Honolulu kalpasan a natumba gapu iti panangrabsot ti maysa a nakabisikleta ti wallet na kabayatan ti panagpagpagna da iti asawa na iti kalsada.
Binigbig ni Bombo International Correspondent Manny Pascua idiay Hawaii ti biktima a ni Dolores Corpuz.
Inbatad na a naipagagangayen iti biktima ken ti asawa na a ni John Corpuz, agtawen ti 92 a tunggal parbangon ket mapanda agpagpagna iti kalsada.
Nupay kasta, kabayatan ti panagsarsaruno da a magmagna ket kellaat lattang nga adda ti nakabisikleta a nangrabsot ti wallet ti baket isut gapuna a natumba na ken naitupar ti ulona ken nagsagaba ti sugat iti nagduduma a paset ti bagina.
Naitaray ti biktima iti ospital idiay Honolulu ngem saanen a nasalbar dagiti doktor ti biagna.
