LAOAG CITY – Nagkamang ti PNP-Laoag ti maysa a baket kalpasan a maipagarup a dinangran ti kabsat na iti Brgy. 17 ditoy ciudad ti Laoag.
Nabigbig ti biktima a ni Mila Adela Lao, 65, awan ti asawa, negosyante idinto a ti suspek ket ni Jaime Lao Sr., 76, naasawaan, agpada a residente iti nasao a barangay.
Basar iti imbestigasyon, bayat a kasarsarita ti biktima ni Engr. Eric Lucas iti sangoanan ti M.A Lao Building ket simmangpet ti suspek ket dita a naaddaan ti nabara a riri dagiti dua agingga a maipagarup a binekkel ni Jaime ni Mila.
Nagsagaba ti gasgas iti tengnged ti biktima ken makarikrika ti sakit iti karabukod rason a masapul a dumalan ti medical legal examination.
Rumrumwar a motibo iti panangdangran ket panggep iti isyu ti sanikua.
Naamoan a nakita ti kabsat ti biktima a ni Teresita Asuncion ken ti apoko na a ni Regina Alfarez iti napasamak a panagdangran.
