LAOAG CITY – Balligi a naarestar dagiti otoridad ti maysa a construction worker babaen ti naisayangkat nga Anti-Illegal Drug Buy-Operation iti ili ti San Nicolas.
Nabigbig ti suspek a ni Glen Dela Cruz y Dumamao, agtawen ti 48, naasawaan, construction worker ken agdama a Brgy. Tanod iti Brgy. 10 iti nadakamat nga ili.
Basar ti imbestigasion a natiliw ti suspek kalpasan a maipagarup a naglako daytoy ti mapapati a shabu iti maysa a polis a nagpammarang kas poseur-buyer.
Nakumpiskar manipud iti suspek ti mapapati a maysa a sachet ti shabu ken buy-bust money nga agbalor iti P7,000.00.
Naammoan nga immunan a natiliw ken naibalod ti suspek iti tawen 2015 babaen iti panagsalungasingna iti Republic Act 9165 wenno Comprehensive Dangerous Drugs Act of 2002.
Kabayatanna, nagtalinaed ti suspek iti salinong ti Philippine National Police iti ili ti San Nicolas para iti naan-anay nga imbestigasion.
