LAOAG CITY – Natay ti maysa a construction worker iti napasamak a desgrasya iti Brgy. Alban iti ili ti Burgos.
Basar iti inisyal nga imbestigasyon dagiti kameng ti PNP Burgos, ti biktima ket driver iti motorsiklo a Red Honda Wave 125, agtawen ti 30, awanan asawa, ken kalubbon na ti pada na a construction worker ken residente iti Brgy. Dadaor iti ili ti Bangui.
Agpapaamianan a direction ti nasao a motorsiklo, ket idi ta nadanun na ti kurba a paset ti kalsada ket maipagarup a napukawan daytoy iti kontrol ti manibela rason nga immagaw iti linya.
Nairana met nga adda ti maysa nga Isuzu Elf truck manipud iti bangir a lane ket dita a nasapgud ti biktima ket naidungpar daytoy iti sumarsaruno pay a kotse.
Naitaray ti biktima iti Rural Health Unit ngem indeklara ni Dr. Pamela Denise Reyes a dead on arrival daytoy, idinto a naipan ti kalubbon na iti Bangui District Hospital para iti naan-anay a pannakataming daytoy.
Saan met a nadangran dagiti driver iti Elf truck ket ti kotse.
