LAOAG CITY – Naalarma ti maysa manen nga ina kalpasan a dandani naitaray wenno nakumaw ti baro na babaen ti grupo dagiti lallaki a nakalugan iti agmaris ti gray a Van iti Brgy. Maglaoi Sentro iti ili a Currimao.
Segun iti ina ti Grade 2 pupil ti Maglaoi Elementary School, dagus a nagipulong ti barona kenkuana idi kaaw-awid na a naggapu iti nadakamat a pagadalan.
Inbatad na a bayat nga agur-uray ti barona iti tricycle service-da nga agawid ket napan gimmatang ti ice candy iti maysa a tianngi nga asideg met laeng iti nasao a pagadalan.
Inpalgakna a nakalukat ti ridaw ti Van a nagluganan dagiti dua wenno tallo a lallaki a saan da a bimmaba ken nakaisem da a mangpaypayapay iti baro na bayat a magmagna daytoy a mapan iti kabsat na ken kadagiti padana nga agad-adal nga agur-uray iti waiting shed.
Inbunannag na a saan nga am-ammo ti barona dagiti grupo ti lallaki isu a saan a naallukoy nga immasideg daytoy.
Innayonna pay a nainayad ti andar ti lugan bayat nga umad-adayo daytoy nga agpa-Manila Road.
Maipalagip a ti naudi a naipadamag a dandani a naitaray wenno nakumaw ket ti Grade 3 pupil iti Buttong Elementary School itay kallabes.
Naipadanon met daytoyen iti biang ti Maglaoi Elementary School tapno mabalaagan dagiti nagannak ken dagiti mangisursuro iti nadakamat a pagadalan.
