LAOAG CITY – Kinumpirmaran ni Police Lt. Joel Corrales, ti chief of police iti ili ti Adams nga adda ti simmuko kadakuda a maysa a kameng ti New People’s Army (NPA) a residente iti nasao nga ili.
Inbaga na a ti simmuko ket maysa a lalaki nga agtawen ti 36, awanan ti asawa, taga Sitio Malaggao iti nasao nga ili.
Inlawlawag ni Corrales iti Bombo Radyo nga idi disyembre 2017 ket adda ti kina-live-in ti simmuko a rebelde no sadinno nga inawis da daytoy kadwa da dagiti nagannak ti babai a mapan da makipaskua idiay Ilocos Sur.
Segun kenkuana, ti live-in partner na ken dagiti nagannak na ket adda ti affiliation da iti rebelde a grupo a nangitunda ti panagbalin na metten a miembro ti grupo.
Inbatad ni Corrales a basar iti simmuko a rebelde, kabayatan ti kaadda da iti bantay ket nagpasar ti ado a rigat isut gapuna a nakisarita da iti lider da a bumaba dan no sadinno nga idi damo ket saan nga immanugot ngem iti kamaudianan na ket pinalubusan da met laeng dagitoy.
Nupay kasta, sakbay a bimmaba dagiti maseknan ket dinoktrinaan ti grupo dagitoy a saan da nga agibagbaga iti maipanggep aktibidad da ken saan da a sumuko iti gobierno.
Inpakaammo ni Corrales a bimmaba dagiti maseknan idi Agosto 2019 ngem naglemlemmeng ti simmuko a rebelde iti kabangibang a probinsya.
Innayon na a babae ti tulong ti pamilya ti summuko a rebelde ken ti mayor iti ili ti Adams ket naallukoy da met laeng daytoy nga agawid iti ili da ken idi Oktubre 21 ita a tawen ket nagdesisyon a sumukon iti gobierno partikular iti PNP.
Nakikoordinar metten da Corrales iti Higher office da para iti seguridad ti simmuko a kameng ti rebelde a residente iti ili ti Adams.
Kabayatanna, patien ni Corrales a possible nga adda ti aktibo a kameng ti rebelde iti Ilocos Sur nga umay agrecrecruit ditoy probinsya.
