LAOAG CITY – Nagballigi dagiti otoridad a nangarestar iti maysa a lalaki iti naisayangkat a gun buy-bust operation iti paset ti Barangay 22, Nagbacalan iti ili ti Paoay.
Ti suspek ket agtawen ti 19 ken residente iti Barangay Callaguip iti ciudad ti Batac.
Basar iti report, ti orihinal a lokasyon ti operasyon ket iti National Highway (Paoay-Balacad road) bisinidad iti Brgy. 2, San Roque iti ili ti Paoay ngem nakadlaw ti suspek rason a pinataray na ti lugan na a maysa a Toyota Fortuner, ngem nakorner dagiti otoridad iti paset ti Barangay Nagbacalan iti nasao nga ili.
Nakumpiskar dagiti otoridad manipod iti siket ti suspek ti maysa a cal. 45 nga addaan ti markings ken magazine nga addaan met ti 8 a bala para iti nadakamat a paltog, maysa nga extra magazine nga addaan ti walo a bala para iti cal. 45 ken dua pay nga extra live ammo para iti cal. 45.
Malaksid iti daytoy, adda pay ti naala a maysa metlaeng a cal. 45 pistol with chamber load ken addaan ti magazine nga adda ti karga na a walo a bala para iti cal. 45.
Adda pay ti nasukimat dagiti otoridad iti ikot ti suspek nga 4 a babassit a sachet a naglaon ti maipagarop a shabu nga agdagsen iti sumuruk-kumurang nga 6 a gramo a mapatta-patta nga agbalor iti P40, 800.00; dua a glass tube tooter; cash nga P18 ribo a pisos; maysa a cellphone, maysa a pagkiloan ken dadduma pay.
Gapu iti daytoy, manamnama a sumango ti suspek iti panaglabsing iti Republic Act 10591 wenno Comprehensive Firearms and Ammunition Regulation Act ke ti Republic Act 9165 wenno Comprehensive Dangerous Drugs Act of 2002.
