LAOAG CITY – Addan iti natalged a ksasaad ken nagtalinaed iti Mariano Marcos Memorial Hospital and Medical Center iti ciudad ti Batac ti lalaki kalpasan a napalto-paltogan iti paset ti Pinili-Nueva Era Road, bisinidad ti Barangay Pagdilao iti ili ti Pinili.
Nabigbig daytoy a ni Bienvinido Fernandez y Baniaga alyas Rambo, agtawen ti 52, awanan ti asawa ken residente iti nasao a barangay.
Segun kenni Police Staff Sergeant Jay-ar Alcoy, imbestigador iti nasao a kaso, bayat nga adda ni Fernandez iti minatayan iti nasao a barangay ket adda ti nakariri na nga agnagan ti Nemy.
Inbatad na a nagkinnarit dagitoy ket kuna ti lalaki nga agkakabil da ngem maipagarop a ti sungbat ni Fernandez ket agpipinnatay da laengen.
Naamoan a bayat a magmagna ni Fernandez nga agawid ket ditoy a napalto-paltogan ti naminpat a daras babaen kadagiti dua a tattao a nakatamaan ti bukot ken luppo na.
Nupay kasta, saan pay a makumpirmaran dagiti otoridad iti nasao nga ili no ti kinariri ni Fernandez iti minatayan ti nangpaltog kenkuana.
Rumrumwar a kalibre 45 a paltog ti nausar iti nasao a pasamak ken nakarekobre dagiti pulis ti uppat a kapsula iti kaadayo nga tallo agingga iti lima a metro ti kaadayo na manipuyd iti biktima.
Kabayatanna, saan a patyen ti pamilya ni Fernandez alyas Rambo a ti nakariri na nga agnagan ti Nemy ti nagpalto-paltog iti nasao a biktima.
Segun kenni Mr. Akyl Fernandez, idi nagriri ti biktima a kabsar na ken ti agnagan ti Nemy ket napalos ti kinabartek ti maseknan rason a mamati a saan na a kabaelan ti pumaltog pay.
Malaksid iti daytoy, kuna pay ni Akyl nga agda ti sakit ni Nemy rason a saan da nga itudo nga isu ti suspek.
Mainaig iti daytoy, inbatad met ni Mr. Rely John Estavillo, maysa kadagiti kapamilya ti nagminatay a nagapoan ti biktima, alas-nuebe idi rabii idi naudi a nakita na ti biktima ken naamoan na nga adda ti nakariri na.
Inbatad na nga idi nakita nan ti biktima ket nakatugawen iti gate ken sipud iti dayta nga oras ket awanen ti damag na iti daytoy agingga a napasamak ti pammaltog.
Rumrumwar iti inisyal nga imbestigasyon a dagiti dua a suspek ket sinurot da ti biktima ken idi adda ti gundaway da ket pinalto-paltogan da daytoy.
Naamoan a ti biktima ket nakapatay iti kallabes babaen ti panangbagkong na iti daytoy.
Agtultuloy met ti imbestigasyon dagiti otoridad seknan iti nasao a pasamak.
