LAOAG CITY – Natiliw ti maysa a lalaki iti naiyuswat a drug buy bust operation idiay Barangay Parado, Dingras Ilocos Norte.
Nabigbig daytoy a ni Federico Patinga y Dumayas, agtawen ti 40, para-luto iti maysa a karinderya iti nasao a barangay ngem residente iti Barangay 4 iti ili ti San Nicolas.
Nagatang ti nagpammarang a gumatang ti droga ti maysa a plastic sachet a naglaon ti maipagarop a shabu nga agbalor ti 500 a pisos.
Malaksid iti daytoy, naala pay iti ikot ti suspek ti dua a sachet a naglaon met laeng ti maipagarop a shabu, maysa a lighter ken ti personal a kwarta na a 383 a pisos.
Naiget met a naglikudan daytoy ni Patinga ken inpetteng na a naimula dagiti droga a nakumpiskar kenkuana.
Segun kenkuana, awan pulos ti ammo na mainaig iti daytoy ken saan nga agus-usar.
Inakusaran pay ni Patinga a kinabil ti maysa a pulis isuna a nakatamaan ti puon ti lapayag na.
Kabayatanna, inpetteng ni Police Chief Master Sergeant Harold Nicolas iti Provincial Drug Enforcement Unit iti INPPO a ti kanayun a rason dagiti matiltiliwan iti drug buy bust operation ket naimula dagiti ebidensya a makumpiskar.
Segun kenni Nicolas, idi pay laeng 2018 a nakaawat da ti report a nagsubli iti panaglako ti droga ni Patinga kalpasan a nadismiss ti kaso na idi natiliw idiay ili ti Marcos idi 2014.
Naamoan a ti Patinga ket adda iti drug watchlist ken maibilang nga street level.
Inbatad na nga iti uneg ti balay a nakatiliwan na ket maipagarop a limmaban kadagiti pulis.
Kuna ni Nicolas a ti pagop-operaran ni Patingga idiay ili ti San Nicolas, Dingras, Marcos ken Sarrat.
Kabayatanna, kuna ni Mrs. Dona Patinga Gaoiran, kabsat ti suspek nga adda ti iggem da a video a mangipaneknek a naimula dagiti nakumpiskar a maipagarop a shabu.
