LAOAG CITY – Inlawlawag ni Mr. Joehan Valdez, agtawen ti 42, mekaniko ken residente iti Barangay Daquiaog iti ili ti Marcos ti maipagarup a panangdangran kenkuan dagiti kameng ti pulisya iti ili ti Marcos.
Iti palawag ni Valdez, naggapu isuna iti Laoag International Airport tapno agitulnog, apaman ti panagawid na ket dimmagas isuna iti family house da iti met laeng nasao a barangay.
Pinasingkedanna a nagiinom da kadwa na dagiti kakasinsin na, no sadinno a nakaubos ti maysa a bote ti arak.
Sakbay a nagawid ket inridep na pay laeng iti lugan na a nakaparking iti igid ti kalsada idi sumangpet dagiti kameng ti pulisya tapno agpatrolya, no sadinno a kinatok da ti lugan na ket apaman a linukatan na daytoy ket ditan a kellaat a dinanog isuna dagiti tallo a pulis nga innaganan na a da Agcaoili, Yuro ken Balanay.
Innayon ni Valdez a saan na a masinunuo ti rason no apay a dinangran da isuna gapu ta awan met ti ammu na a basol na ken amammu na pay dagitoy sipud ta customer na isuna iti trabaho na.
Kabayatanna, nagpa-blotter metten ni Valdez ken iti agdama ket iyur-uray na laengen ti resulta ti medical na.
