LAOAG CITY – Natay ti maysa a baro idinto a nasugatan ti kabsat na iti napasamak a pammagkong iti paset ti Sitio Pamalian, Barangay 57-Pila ditoy ciudad ti Laoag.
Nabigbig ti natay a ni Vincent Magaoang, agtawen iti 19, baro, mannalon, idinto a ti nasugatan a kabsat na ket ni Klein Magaoang, agpada dagitoy a residente ti nasao a barangay.
Segun ti report, bayat ti panagin-inom ti ama na a ni Mr. Vicente Magaoang ken ti kabarangayan da a ni Jenesor Tamayo ket adda ti saan da a nagkinnaawatan.
Naamoan a nagawid ni Tamayo ken idi nagsubli ket kinomprontar ti ubing Magaoang.
Kabayatanna ti komprontasyon ket inruwar ti suspek ti immuko na ket inbagkong na iti akin-kannawan nga abaga ti biktima.
Ginandat ti kabsat ti biktima a ti aganawa ngem uray daytoy ket binagkong ti suspek iti akin-kannigid nga ima na.
Agpada a naitaray dagiti agkabsat iti Governor Roque Ablan Senior Memorial Hospital ditoy ciudad ti Laoag ngem naideklara ni Vincent Magaoang a pimmusayen idinto nga agtultuloy a maag-agasan ti kabsat na.
Agtultuloy ti panangbirbiruk dagiti otoridad iti suspek kalpasan a naglibas kalpasan ti napasamak a pammagkong.
