LAOAG CITY – Kinumpiraman ni Brgy. Chairman Edilberto Gudoy iti Barangay Barong iti ili ti Dingras a pimmusayen ti maysa kadagiti nagpositibo iti covid-19 a maysa a baket.
Segun kenni Gudoy, malaksid iti panagpositibo iti virus ti biktima ket datin nga adda dagiti sagsagabaen na a sakit no sadinno ket diabetic daytoy.
Ummuna iti daytoy, kuna ni Gudoy nga idi manarimaan ti panagswab dagiti kabarangayan na gapo iti kellaat a panagado ti kaso ti covid-19 iti barangay da ket nagboluntaryo ti maseknan a dumalan iti RT-PCR gapo ta nagpositibo ti kabsat daytoy.
Kunana a a kabayatan daytoy ket nagkiddaw ti baket a mapan iti ospital gapo ta marigatan nga umanges ngem idi simmayaat ti kondisyon na ket nagbabawi a mapan iti ospital.
Nupay kasta, inbatad na nga idi kalman ket simken ti sakit ti baket rason a naitaray iti ospital ngem itay parbangon ket pimmusayen daytoy.
Mainaig iti daytoy, agpapan maisursurat ti damag ket saan pay a makumpirmaran ti kapitan no sadinno ti pakaitabonan ti bangkay ti biktima gapo awan pay ti pinal a desisyon ti pamilya no ma-cremate wenno saan.
Naamoan a ti barong ket addaan ti pakadagupan a 48 a kaso ti covid-19.
Kabayatanna, linawlawagan ni Kapitan Gudoy a sipud adda ti nagpositibo iti covid-19 iti barangay da ket awanen ti naiyus-uswat a social gathering.
Rakurak na daytoy kalpasan nga adda ti reklamo wenno mababbabalaw dagiti opisyales ti barangay gapo ta maipagarop nga iti maysa a pasken ti rason ti panagado ti kaso ti virus iti lugar da.
Immapela daytoy kadagiti kabarangayan na nga agtitinnulong iti kastoy a panawen ti krisis gubuay ti covid-19.
