LAOAG CITY – Kinumpirmaran ni Police Lt. Col. Mar Loiuse Bondoc, ti chief of police ti PNP-Batac ti pannakatay ti maysa kadagiti suspek iti attempted robbery a nagtennag a pammaltog iti Sitio 2A, Barangay Bungon iti nasao a ciudad.
Binigbig ni Bondoc ti natay a ni Robert dela Cruz Franco, agtawen ti 45, awanan ti asawa ken residente iti Barangay Sta. Rita iti ili ti Paoay, ken isuna ti maysa kadagiti suspek iti attempted robbery.
Segun kenni Bondoc, iti inisyal nga imbestigasyon da, napan dagiti dua a suspek iti Sari-Sari Store a kukua ni Noli Ababa y Retotar, agtawen ti 25, addaan ti live in partner ken residente iti Brgy. Caunayan iti nasao a ciudad.
Kunana a gimmatang ti sigarilyo ni Franco ngem kellaat lattan a dinanog-danog na ni Ababa isut gapo na a bimmales met daytoy.
Nupay kasta, inbatad na a gapo iti daytoy ket immasot ti paltog ti maysa pay kadagiti suspek ken inpaturong na kenni Ababa ngem limmaban manen daytoy agingga a ti napaltogan ket ti maysa met laeng kadagiti suspek a ni Franco.
Gapo iti daytoy, dagus a naglibas dgaiti dua a suspek ngem gapo iti sugat a sinagaba ni Franco ket nabati iti kataltalonan nga isu metten ti nakatayan na.
Narekobre met iti nakapasamakan ti insidente ti maysa nga slug ti kalibre 45 a paltog.
Mainaig iti daytoy, kunana a makikokordenar da iti PNP-Paoay tapno madeterminar no adda ti koneksyon daytoy a pasamak iti panagholdup iti ili ti Paoay iti kallabes.
Kabayatanna, agtultuloy pay laeng ti naiget nga imbestigasyon dagiti kameng ti PNP-Batac iti napasamak nga insidente para iti pannakabigbig pay ti katatao ti maysa kadagiti suspek a nakalibas.
