LAOAG CITY – Maysa manen a pakete a maipagarop a shabu ti nakita ti maysa a mangngalap iti kabaybayan iti ili ti Pasuquin.
Nabigbig ti mangngalap a ni Mr. Marnie Cariaga, residente iti Barangay Davila iti nadakamat nga ili.
Naamoan a ti nasao a pakete ket kapada metlaeng dagiti immunan a nakita dagiti mangngalap iti kabaybayan iti ili ti Burgos ken iti ili ti Pasuquin.
Inbatad ni Cariaga nga agawid da koman manipod iti panagkalap da tapno ilako dagiti nakalap da nga ikan idi nakakita da ti barko.
Kuna na nga idi nakaasideg iti barko ket nakita na ti agtatapaw a plastic isut gapuna nga inyaon na daytoy.
Innayon na nga idi linukatan na ti bassit a paset ti plastic ket nakita na ti puraw a karga na ken napanunot na dagiti immuna a nakitkita a nakapakete a shabu iti kabaybayan a paset ti Ilocos Sur ken iti paset ti Ili ti Burgos ken Pasuquin.
Ti maysa a pakete a shabu ket agdagsen ti 997.32 a gramo.
Maipalagip a daytoyen ti maikatlo a pakete a nakita dagiti mangngalap iti kabaybayan a paset ti Ilocos Norte partikular iti ili ti Burgos ken Pasuquin.
