LAOAG CITY – Natay ti maysa a lalaki kalpasan a pinaltogan ti bukod na a bagi iti ili ti Bangui usar ti kalibre 45 a paltog.
Segun kenni Police Lt. Christopher Pola, ti chief of police ti PNP-Bangui, ti biktima ket agtawen ti 41, maysa a mannalon ken residente iti Barangay Lanao iti nasao nga ili.
Inbatad ni Pola a basar iti imbestigasyon da ken basar iti palawag ti menor de edad nga anak ti biktima, simmangpet a nabartek ti ama na ken kasarsarita na iti cellphone ti nobya na a taga Baguio City.
Inlawlawag na nga idi nagtugaw iti salas ti biktima ken napan metten naturog ti ubing.
Nupay kasta, nakangeg ti putok ti ubing isut gapo na a rimuar iti kwarto na ken nakita na ti ama na a nakadasay ken dara-dara ti ulo na.
Kuna pay ni Pola a ti biktima ket saan a rehistrado nga agikot ti paltog rason a nangipatulod da ti Firearms verification request iti Camp Crame tapno maamoan no siasinno ti akin-paltog ti inusar ti biktima.
Mainaig iti daytoy, kuna ni Pola a ti menor de edad nga anak ti biktima ket adda ita iti kustudiyar ti DSWD iti ili ti Bangui.
