LAOAG CITY – Pimmusay ti maysa nga indibidual kalpasan naidungpar ti naglugananna a motorsiko iti poste iti Brgy. Capangadanan iti ili ti Pinili .
Segun ken ni P/Maj Antonio Marzan, hepe ti Philippine National Police iti nadakamat nga ili ti biktima ket agtawen iti 24 ken residente iti ili ti Curimmao.
Basar iti imbestigasion, dumaldalyasat iti laud a direksyon ti biktima idi kellat daytoy a naidungpar iti maysa a poste.
Gapu iti daytoy, natukkol ti tengged ti biktima ken ti akin-kannigid a sakana indinto nga insigida a naitary ti biktima iti Mariano Marcos Memorial Hospital and Medical Center ngem naideklara a dead on arrival babaen iti attending physician-na.
Malaksid iti daytoy, inpakaamona a napaspas ti taray ti motorsiklo a nagluganan ti biktima ken nakainom idi napasamak ti insedente.
Kabayatanna, nagpalagip ni Marzan kadagiti residente iti ili ti Pinili a saan nga agmaneho nu adda iti impluwensya ti nasanger tapno maliklikan iti ania man a desgrasya.
