LAOAG CITY – Naarestar ti maysa a mekaniko iti naisayangkat nga Anti-Illegal Drug Buy-bust Operation babaen ti Philippine National Police – Vintar, Provincial Drug Enforcement Unit ken ti Philippine Drug Enforcement Agency iti sangwanan ti Slaughter House iti nasao nga ili.
Nabigbig ti subject ti operasyon a ni Generoso Villanueva y Ramos, drug surrenderee, agtawen ti 43, addaan ti live in partner, mekaniko ken residente Brgy.5 iti nasao a lugar.
Natiliw ni Ramos kalpasan a naglako ti maysa a sachet a naglaon ti maipagarop a shabu iti nagpammarang a poseur-buyer iti balor a sangaribo a pisos.
Nakumpiskar pay manipud kenni Villanueva ti pito a sachet a naglaon ti maipagarop a shabu, glass tube tooter ken maysa a lighter.
Mainaig iti daytoy, inadmitir ni Ramos a nagusar ti iligal a droga iti napalpalabas nga aldaw ken gimmatang ti maipagarop a shabu iti indibidual a saan na nga am-ammo.
Nupay kasta, naglikudan ni Villanueva a kukua na dagiti naala dagiti otoridad manipud kenkuana iti nasao nga operasyon.
Kabayatanna, kunana a dakkel ti panagbabawi na na a nagusar ti maipawil nga agas.
Iti agdama, nagtalinaed iti kustudiyar ti Philippine National Police iti ili ti Vintar ni Villanueva.
