LAOAG CITY – Inpeksa ni Dr. Sherly Agrupis, Presidente iti Mariano Marcos State University (MMSU) iti ciudad ti Batac ti sakit ti nakem na iti maysa a radio station ditoy probinsya.
Daytoy ket gapu iti panangakusar da kenkuana nga awan ti sursuro na, nagbugbukaw ken nagwalwala kabayatan ti papanda pananginterview maipanggep iti proyekto ti nasao nga unibersidad nga “Asukal mo, Alcohol mo”.
Inpetteng na a saanna a mapalabas daytoy nga inaramid kenkuana ti saannan a dinakamat nga estasyon gapu ta adda ti sursuro na ken adal na.
Inyistorya ni Agrupis nga adda ti maysa a TV station a nagpa-appoint ti interview kenkuana ken kiniddaw na a makita ti panagaramid da ti ethyl alcohol, ngem gapu ta napan ni Governor Matthew Marcos-Manotoc ket saanna a dagus a nasango.
Inbatad na nga idi nakapanaw ti gobernador ket adda ti dimteng a grupo iti sabali nga estasyon ken ininterview da ti maysa nga Staff na.
Kuna na a kalpasan ti sumagmamano a minutos ket inbilin na iti staff na nga i-summarize nan ti ar-aramiden na ken mapanna kitaen ti reporter ti TV station nga immunan a nagpa-appoint ken nabayagen nga agur-uray.
Segun kenkuana, kalpasan a nakapanaw ti staff na ket sinango na dagiti dadduma a kameng ti media ngem sinurot na ti protocol a social distancing gapu iti covid-19 ken personal na pay nga inpasyar dagitoy ken inikkan na ida ti alcohol.
Saanna a ninamnama a kalpasan iti inaramid na ket kondenaren ken binanatan pay laeng isuna ti maysa a radio station.
