LAOAG CITY – Inbasura ti Commission on Elections ti Motion for Reconsideration nga inpila ni Vice Mayor Kitt Aguinaldo iti ili ti Pasuquin.
Gapu iti daytoy, nakanselar ti Certificate of Candidacy ni Aguinaldo gapu iti material misrepresentation.
Maipalagip a nangipila ni Vice Mayor Aguinaldo ti Motion for Reconsideration iti Commission on Elections idi Agosto 2025 kalpasan a nakaawat daytoy ti surat manipud iti Commission on Elections nga inaprobaranna ti petision a makanselar ti kandidatura ti opisial iti panagpaidasigna iti kina-Bise Mayor gapu iti maipagarup a saan nga umiso nga impormasion dagiti nakailanad iti Certificate of Candidacy-na.
Inbatad ni Aguinaldo nga amin nga impormasion a naipalaon iti Certificate of Candidacy daytoy ket husto ngem inadmitirna nga adda ti nagkamalianda a notarized date.
Immuna iti daytoy, inpetteng ti Bise Mayor nga awan ti kinapudnona nga isuna ket United States citizen no diket maysa daytoy a Filipino citizen.
Kabayatanna, bayat a maisursurat daytoy a damag ket ikarkarigatan ti Bombo Radyo Laoag News Team nga alaen ti reaksion wenno komento da Vice Mayor Aguinaldo ken dati a Sangguniang Bayan Member Rachelle Leinaleigh Aguinaldo Ferrer maipanggep iti daytoy a banag.
