LAOAG CITY – Nagdinnungpar ti maysa a motorsiklo ken Fortuner iti Airport Road partikular iti maysa a pasdek ti Construction Supply iti Brgy. 47-Bengcag ditoy siudad ti Laoag.
Basar iti imbestigasion ti Philippine National Police ditoy siudad ti nagmaneho iti Honda Wave a motorsiklo ket agtawen ti 44, lalaki ken residente iti Brgy. 43 Cavit, idinto a ti nagmaneho ti Toyota Fortuner ket agtawen ti 29, lalaki ken residente iti Brgy. 62-B Navotas-South ken dagiti dua a pasaheros na a babbai nga agtawen ti 24 ken maysa a menor de edad nga agapada a residente iti Brgy. 48-A Cabungaan ditoy siudad.
Mainaig iti daytoy, agturturong iti luad a direksion ti motorsiklo idinto nga agpapadaya a direksion ti fortuner nga adda iti agsinnungbangir a direksion ti motorsiklo ken fortuner ket immagaw ti linya ti motorsiklo rason a nagdinnungpar dagitoy.
Gapu iti daytoy, nagsagaba ti sugat iti nagduduma a paset ti driver ti motorsiklo ken naitaray iti Governor Roque Ablan Sr. Memorial Hospital para iti naan-anay a pannakatamingna idinto a saan a nadangan ti driver ti lugan ken dagiti dua a pasahero na.
Kabayatanna, naipan iti kuerpo ti Philippine National Police ditoy siudad ti Laoag dagiti lugan tapno maamoan ti gatad dagiti nadadael.
Iti agdama, agtultuloy ti naun-uneg nga imbestigasion ti otoridad iti napasamak nga insidente.
