LAOAG CITY – Sumagmamano a mannalon a nagmula iti tabako ditoy probinsya, kangrunaan na iti ili ti Badoc ti naapektaran iti mula na iti panagar-arbis na iti kallabes.
Gapu iti daytoy, gutgutiguten ti Sang Panlalawigan dagiti mannalon nga irehistro da dagiti mula da iti Philippine Crop Insurance Corporation.
Naamoan a gapu iti nalamiis a paniempo ket adon dagiti mannalon ditoy probinsya a naapektaran ken nadadael ti mula a tabako, partikular ti Burley ken Virginia tobacco.
Inbatad ti Sang Panlalawigan a no mairehistro iti Philippine Crop Insurance Corporation dagiti mula a tabako ket maipaayan ti nayun a tulong dagiti mannalon a maapektaran, malaksid pay iti ipapaay a tulong ti gobierno probinsyal.
Maipalagip nga iti napalabas a tawen ket umabot iti agarop 3 ribo a Tobacco farmers ti nabenepisyaran ti production grant iti National Tobacco Administration.
