LAOAG CITY – Inbinsa-binsa ni Mayor Edmar Vincent Bonoan ti naggapoanan ti ili ti San Nicolas kagiddan ti State of the San Nicolas Address daytoy.
Inpasiguradona nga aramidenna ti amin a kabaelanna tapno maaramid dagiti programa ken proyekto ti ili.
Inpanakkelna dagiti proyekto a naaramidanna kas iti panangikkat iti illegal a droga iti ili no sadinno 24 a barangay ti drug-free ken inpanamnamana a mapagtalinaed wenno maikkat a maminpinsan ti illegal a droga.
Mainaig met iti canal wenno drainage system, inpakaammona a manarimaan a maar-aramid dagitoy ken inlawlawagna a saan a maiyalisto a malpas nga insigida gapu ta dakkel ti pundo a masapul isu phase by phase ti pannakaaramid ken inpangpangrunada ti main canals.
Inbatadna nga addan ti traffic lights ken manamnama a mausar inton sumaruno a bulan pakairamanan pay ditoy ti pannakatarimaan ti amin a Close Circuit Television wenno CCTV camera para iti linak, urnos ken talna iti lugar .
Manamnama met iti pannakaipatakder ti San Nicolas Legislative Building a maysa a legacy of the 13th Sangguniang Bayan ti San Nicolas.
Innayonna a manarimaan ti negosasion iti munisipio iti dakkel a mall babaen iti pannakapaitakder ti central terminal ken nakasagana ti ili ti San Nicolas a mangsuporta iti transport terminal.
