LAOAG CITY – Sinelebraran ti Mariano Marcos State University ti maika-44 a founding anniversary no sadinno a naipalaon dagiti nagappuan ti unibersidad itay tawen 2021.
Iti State of the University Address ni Dr. Shirley Agrupis, Presidente iti Mariano Marcos State University, nadakamat dagiti ballaigi a naaramidan da kas iti panagaramid ti alcohol manipud iti Nipa.
Karaman pay ti programa ti unibersidad, dagiti nakapasa iti licensure examination ken dagiti naruay a pammadayaw iti nagduduma a departamento ti nasao a pagadalan.
Panagpamula ti Nipa iti probinsya ti Cagayan, Pangasinan ken ditoy probinsya rason nga ado nga alcohol ti naaramid ti MMSU.
Kabayatanna, inpakaammo pay ni Agrupis a ti MMSU ti maysa kadagiti State Universities and Colleges ti naaprobaran ti plano na a mangiyuswat ti limited face-to-face classes para iti napinpintas a pannakaipaay ti de kalidad nga adal dagiti estduyante.
Mangrugi ti F2F classes intono Pebrero 7 ita a tawen.
Inbatad ni Agrupis a babaen ti protocol nga ipatpatungpal da kontra iti COVID-19, naipaayan da ti bileg a nangiyuswat ti limited face-to-face classes babaen ti suporta ti gobyerno probinsya, nagduduma nga stakeholders, component LGUs ken iti lokal a gobyerno iti siudad ti Batac.
Naaddaan ti limited face-to-face classes iti benneg ti Health Sciences and Medicine a nagapekto iti second semester 2021-2022 agraman kadagiti dadduma a programa nga idiaydiaya ti unibersidad.
Innayon na a maysa ti MMSU Higher Education Institutions ti nangatuan ti vaccination rate gapu ta umabot ti 99.5% ti nabakunaan nga empleyado, ken 99 a porsiento dagiti nabakunaan nga estudyante.
Nagserbi pay ti MMSU kas vaccination center para kadagiti umili.
