LAOAG CITY – Natay ti maysa kadagiti nakalugan ti kurong-kurong kalpasan a dinungpar ti kotse iti national highway iti Brgy. 3, San Andres II iti ili ti Bacarra.
Basar iti Philippine National Police iti nasao nga ili, nabigbig ti driver ti kurong-kurong a ni Marino Ranada y Viernes, agtawen ti 66, naasawaan ken ti pasaherona a ni Rubina Ranada y Calzada, agtawen ti 66, naasawaan ken agpada dagitoy a residente ti Brgy. 15, Pangil iti ili ti Pasuquin.
Nabigbig met ti nangiturong ti kotse a Mitsubishi Mirage nga agmaris ti nangisit nga addaan ti plate number nga IDI 1812 a ni Nixon Saguibo y Aceret, agtawen ti 34, naasawaan ken residente ti Brgy 21, Libtong iti ili ti Bacarra.
Gapu iti daytoy, nagsagaba ti sugat iti nagduduma a paset ti bagi ni Marino ken naitaray iti Governor Roque B. Ablan Senior Memorial Hospital iti siudad ti Laoag babaen iti Paramedics ti Municipal Health Office iti ili ti Bacarra idinto a ni Rubina ket naitaray iti Bacarra Medical Center babaen iti Ambulance ti Bureau of Fire Protection iti nasao nga ili ngem naideklara a dead on arrival babaen iti attending physician a ni Dr. Stephanie Ortal idinto a ni Nixon ket naikabil met iti Governor Roque B. Ablan Senior Memorial Hospital para iti pannakatamingna ken natakuatan a nagpositibo daytoy iti Alcohol Breath Analyzer Test.
Basar iti naisayangkat nga imbestigasion, kabayatan a dumaldalyasat dagiti dua a lugan nga agpada nga agpa-daya iti national highway iti Brgy. 3, San Andres II iti ili ti Bacarra ket kellaat a dinungpar ti kotse iti likud a paset ti kurong-kurong no sadino dagus a naglibas ti driver ti kotse.
Nupay kasta, natiliw dagiti napan nagresponde nga otoridad ti driver ti kotse iti Public Market iti Brgy 40, Buyon iti ili ti Bacarra.
Kabayatanna, naammoan a nakaro a nadadael ti kurong-kurong idinto a naperdi met iti akinkannawan a sango a paset ti kotse a manarimaan pay laeng a maim-imbestigar maipapan iti balor ti perdi dagiti dua a lugan.
