LAOAG CITY – Dead on the spot ti nakamotorsiklo kalpasan ti pannakidinnungparna iti maysa a van iti national highway iti Brgy. Buyon iti ili ti Bacarra.
Segun ken ni Police Lieutenant Colonel Roldan Suitos, ti Hepe iti Philippine National Police iti nasao nga ili, nabigbig ti biktima a nangiturong iti motorsiklo a Yamaha Mio Soul a ni Marilo Rumbaoa ken residente iti Brgy. Poblacion 3 iti ili ti Pasuquin idinto a nabigbig met ti driver ti van a Mercedez-Benz nga agmaris ti puraw a ni Gayuzar Vargas ken residente iti Brgy. Poblacion iti ili ti Pasuquin.
Inbatadna a basar iti insayangkatda nga imbestigasion, kabayatan a dumaldalyasat ti motorsiklo nga agturong nga agpa-abagatan ket kellaat a dimmungpar ti van nga agturong met nga agpa-amianan.
Inlawlawagna a nag-overtake ti van agingga nga immagaw daytoy ti linya iti motorsiklo a nangitunda ti pannakidinnungparda.
Gapu iti daytoy, inpalgakna a nagsagaba ti nakana a sugat ti biktima idinto a saan met a naan-ano dagiti nakalugan iti van.
Mainaig iti daytoy, manamnama pay laeng nga agsarita dagiti agsumbangir a partido maipapan iti napasamak nga insidente.
Kabayatanna, iti agdama ket nakabalud ti driver ti van a posible a sumango iti kaso a Reckless Imprudence Resulting to Homicide and Damage to Property.
