LAOAG CITY – Inbatad ti Department of Migrant Workers a nakasublin ditoy Pilipinas ti 84 Overseas Filipino Workers manipod iti Israel.
Basar iti Department of Migrant Workers, dagiti Overseas Filipino Workers ket karaman kadagiti apektado ti riribok iti nagbaetan ti Israel ken militante a grupo nga Hamas.
Inpakaammo ti ahensya nga umaboten iti 972 nga Overseas Filipino Workers ken 28 a dependents ti pakabuklan ti bilang dagiti nakasublin iti pagilian sipud narugyan ti voluntary repatriation program idi Oktubre 18 iti napalabas a tawen.
Sinarabo dagiti mangibagbagi ti gobierno dagiti nasao nga Overseas Filipino Workers ken dagus da nga inpaayan dagitoy ti maiyannatop a tulong.
Iti maysa nga statement, inrakurak ni Migrant Secretary Hans Leo Cacdac nga agtultuloy ti pannakikoordinar da iti Department of Foreign Affairs tapno masigurado ti kinatalged dagiti Overseas Filipino Workers iti Middle East.
