LAOAG CITY – Inrubuat ti gobierno ti Nationwide Rice Price Monitoring tapno makita ti epekto ti panagkissay iti taripa ti panagangkat ti bagas iti pakabuklan a supply chain manipud kadagiti importer nga agturong kadagiti retailer.
Iti nairuar nga statement, nailanad nga inrubuat ti Department of Trade and Industry iti pannakitinnulong ti Department of Agriculture ti naiplawa a price monitoring initiative a sakupen ti nalawa a retail markets pakairamanan dagiti supermarkets, hypermarkets ken grocery stores iti babaen ti hurisdiksion ti Department of Trade and Industry and wet markets a sakupen met ti Department of Agriculture.
Inbatad ni Trade Secretary Alfredo Pascual, agtalinaed a mapagtalkan ti departamento iti naiget a panang-monitor ken panangarisit iti pabaliw-baliw a presio ti bagas iti merkado.
Maipalagip nga immunan nga inparuk-at ni Presidente Ferdinand Marcos Jr. idi Hunio ti Execuitve Order No. 62 para iti panangkissay ti taripa iti bagas manipud iti 35% iti 15% pakairamanan ti taripa kadagiti dadduma pay a produkto agrikultura.
