LAOAG CITY – Nawaywayan dagiti atleta ditoy ciudad ti Laoag nga usaren ti Ferdinand Marcos Stadium para iti panagsagana da iti Region 1 Athletic Association Meet.
Daytoy ti inpakaammo ni Mr. Hipolito Salva Jr. ti mangidadaulo ti Sports Development Office ditoy ciudad ti Laoag.
Kuna na a malaksid kadagiti pambato ti Schools Division Office of Laoag City ket kadwa da pay dagiti atleta iti Schools Division Office ti Ilocos Norte.
Innayon na nga adda ti panangorganisar da iti oras a panagusar da ti Ferdinand Marcos Stadium para iti panagsanay dagiti atleta ditoy ciudad ti Laoag ken iti probinsya.
Maipalagip nga iti napalabas a tawen ket adda ti nagbalin nga isyu mainaig iti panagbayad nga umuna dagiti atleta sakbay a mausar da ti Marcos Stadium para iti panagsanay da.
