LAOAG CITY – Kinumpirmaran ni Police Supt. Edwin Balles, Chief of Police iti Laoag City nga adda dagiti negosyante a nakaaw-awat ti tawag ken text message a dumaw-dawat ti kuarta a nagpabigbig a kameng ti New peoples army.
Kuna ni Balles a basar ti dimmanon kadakuada nga impormasyon a no saan a mangted dagiti nakaawat ti text message ken tawag ket napangtaan da nga adda ti mapasamak iti negosyo da wenno makidnap da.
Imbatad ti hepe ti pulisya ti agar-aramid iti dayta ket saan laeng a maymaysa ngem ketdi nagduduma daytoy a grupo dagiti kriminal.
Impagunam-guman ni Balles kadagiti maseknan a makaaw-awat ti text message ken tawag a saan da nga ited aniaman a kiddawen dagiti maseknan.
Kuna na nga iti kanito a mangted da ket pagbalinen dan dagitoy a “milking cow”.
Inallukoy ni Balles dagiti makaawat ti tawag ken text message nga agturong da iti opisina na tapnu maaksyon ti nasao a banag.
