LAOAG CITY – Napalaus ti ladingit ti pamilya ti natay nga OFW a ni Margie Ganiron Castro idiay Morocco a taga Sarrat, Ilocos Norte.
Segun ti kabsat na a ni Mrs. Gina Ganiron Bolibol, taga Barangay 4, Sarrat, Ilocos Norte ngem napan da nagnaed idiay Villa Conception, Roxas, Isabela, immuna a nagturong ti kabsat na idiay Dubai ngem kalpasan laeng ti sumagmamano nga aldaw ket immakar da iti pagilyan a Morocco kadwa na ti amo na.
Rumrumuar a nagriri ti biktima ken amo na isut gapuna a ginandat ti OFW ti aglibas usar ti napagsisilpo a tela ken magna koma iti tawa idi maipagarop nga aksidente a natennag manipod iti 3rd floor.
Inbatad ni Mrs. Bolibol a tumultulong metten ti gobierno para ti pannakaiyawid ti bangkay ti kabsat na ditoy pagilyan.
Naamoan nga addan iti kustodya dagiti otoridad ti amo ti natay nga OFW.
Mangnamnama ni Mrs. Bolibol a maikkan ti hustisya ti pannakatay ti kabsat na idiay Morocco.
