LAOAG CITY – Posible a mangipila ti Office of the Ombudsman iti Sandiganbayan ti baro a bansada ti kaso kontra kadagiti karaman iti maanomalya a flood control projects ita a lawas.
Inbatad ni Assistant Ombudsman Atty. Mico Clavano, addan dagiti kaso nga up for filing ken mabalin daytoyen a mapasamak ita a lawas.
Nagkedked met ni Clavano nga inaganan no asino dagiti senador ken kongresista ti pilaan ti kaso.
Immunan nga inrakurak ni Ombudsman Jesus Crispin Remulla nga apaman a madanon ti Disiembre 15 ket addan ti iparuk-aten a warrant of arrest kontra kadagiti big fish wenno dagiti dadakkel a personalidad a karaman kadagiti maanomalya a proyekto.
Karaman ditoyen dagiti senador, congressman, dagiti opisial ti Department of Public Works and Highways ken dagiti contractor.
Nupay kasta, kuna ni Clavano, nakadepende latta ti maiparuk-at a warrant of arrest iti dagsen ti kaso ken dagiti ebidensia kontra kadagiti karaman iti flood control anomaly.
