LAOAG CITY – Ipatungpal ti Mariano Marcos Memorial Hospital and Medical Center iti siudad ti Batac ti online appointment system para kadagiti agpakonsultar iti ospital mangrugi intono Hulyo 6 ita a tawen.
Daytoy ti inpakaammo ni Doctor Wilfredo Magcalas, chairman ti OPD Department iti nasao nga ospital kabayatan ti interview kenkuana iti programa a Doctor Bombo ti Bombo Radyo Laoag.
Inlawlawag na a babaen iti daytoy ket masurot a naimbag ti physical distancing tapno maliklikan ti panagwaras ti COVID-19.
Kabayatanna, addan ti naaramid a page ti MMMH iti facebook a pakakitaan ti OPD Clinic nga isu ti pagrehistroan.
Kuna na nga agrehistro dagiti maseknan iti E-Clinic, tumawag wenno maitext ti OPD Clinic, maikkan ti appointment schedule ken nasken a mapan iti naituding a petsa a panagpakonsultar dagiti maseknan.
Segun kenni Magcalas, ti oras ti panagpakonsultar ket alas-otso ti bigat agingga iti alas-singko ti malem, Lunes agingga iti Biernes idinto nga awan iti appointment iti holidays.
Innayon na nga awan met ti limistasyon dagiti maakumudar nga agpakonsultar nga out-patients.
Masapul a saan a mapunas dagiti mensahe ti ospital nangruna ti appointment da ken iti facebook ket maikkan ti confirmation ti appointment dagiti maseknan.
Dagus met a mailista ti nagan dagiti nagparehistro a mapan agpakonsultar.
Mainaig iti daytoy, inbaga ni Dr. Magcalas a no adda dagiti mailaw-an a mapan agpakonsultar a saan a nakaparehistro iti online wenno text ket mataming da latta ngem maiprayoridad dagiti nakaparehistro.
