LAOAG CITY – Naiget a kinontra ni House Committee on Justice Chairperson ken Lead Prosecutor Rep. Gerville Luistro ti ilunglungalong nga online voting iti impeachment trial ken ni Vice President Sara Duterte.
Inpetteng ni Luistro a nakapatpateg ti proseso isu a nasken a personal a maimatmatangan ti senator-judge ti trial ken rumbeng a personal nga agbutos.
Sungbat daytoy ni Luistro iti rakurak ni Sen. Rodante Marcoleta iti posibilidad a palubosan ni Sen. Ronald “Bato” dela Rosa a makipaset ken agbutos iti impeachment proceedings online wenno iti babaen ti zoom.
Inbatadna nga iresrespetarna ni Marcoleta ken Dela Rosa ngem masapul nga ikonsiderar ti kinapateg ti impeachment process.
Inpaganetgetna a napateg a personal a makitkita ti senator-judge ti tunggal testigo pakairamanan ti tunggal papel ken video nga idatdatag a sumupsuporta iti Articles of Impeachment.
