LAOAG CITY – Matuloy ti panagsubli ti Commercial Flight Operations ti Laoag International Airport (LIA) a naituding ita nga aldaw, Hulio 20 iti laskid nga adda ti nagpositibo a miembro ti Philippine Airforce a nakadestino iti nasao nga erupuerto.
Daytoy ti inpakaammo ni Civil Aviation Authority of the Philippines wenno CAAP iti Laoag International Airport General Manager Ronald Estavillo.
Segun kenkuana, dimmalan iti rapid test ita nga aldaw dagiti empleado ti erupuerto nangruna dagiti agserserbi iti eroplano idinto a naituding nga inton bigat met ti pannakaipadalan da iti swab test.
Inbatad na nga” strictly drop-off” laeng ti passenger ken dagiti ramit da ken nasken nga awan ti sabali a kadua da no diket driver laeng.
Inpakaammo na a maala ti body temperature, nakasaganan metten ti disinfection ken handwashing facilities iti erupuerto ken adda pay dagiti markers a paglasinan ti pagbaetan dagiti tattao tapno maipasigurado a maipatungpal ti Ssocial distancing.
Inlawlawag na nga iti agdama ket adda ti international health standard a sursuruten dagiti amin nga airlines tapno maipasigurado ti social distancing iti uneg ti eroplano.
Kunana nga adda ti High Efficiency Particulate Air filter ti Philippine Airlines tapno nadalus ti angin iti uneg.
Maipalagip nga inaprobaran ni Gov. Matthew Marcos Manotoc ken ti Task Force Salun-at ti flights ti Philippine Airlines ditoy probinsya.
Kabayatanna, agtultuloy ti naiget a panagmonitor dagiti security guard iti main entrance ti LIA a maipawil pay laeng a sumrek dagiti saan nga empleado ti nasao nga erupuerto pakairamanan dagiti kameng ti media.
Ummuna iti daytoy, ado dagiti behikulo a nagpila iti pagserrekan ti LIA a dagitoy ket dagiti outgoing passengers nga agturong idiay Metro Manila.
