LAOAG CITY – Temporaryo pay laeng a nabaliwan ti oras a panaglako iti merkado publiko ditoy ciudad ti Laoag.
Daytoy ket gapu pay laeng ti naipatungpal nga Enhanced Community Quarantine iti intero a Luzon seknan iti pangta ti Coronavirus.
Mangrugi nga aglukat iti merkado publiko iti oras ti alas-sais ti bigat agingga iti alas-siete ti rabii.
Karaman kadagiti agtalinaed a nakalukat iti merkado publiko ket iti paglakoan ti nateng, ikan, karne, frozen foods, Groceries, paglakoan ti bagas, prutas, pasarabo ken Money Changing wenno bangko.
Maipalubos pay nga adda ti aglukat a karinderya ngem masapol a saggaysa laeng iti kada aldaw ken mangaramid ti schedule dagiti maseknan.
Malaksid iti daytoy, saan pay a mabalin a mangan ti siasinno man iti karinderya no di ket ti laeng maipalubos ket take out.
Kabayatanna, temporaryo a nasuspenso ti operasyon ti open ken night market, pakairamanan dagiti Flower Shops, Dry Goods, Beauty Parlors, Dress Shops, Jewelry (Repair) Shops, Chiceria, Cellphone Accessories ken dadduma pay a negosyo a saan a karaman iti operational sections.
