LAOAG CITY – Pinabasol ti China ti Pilipinas iti napasamak iti Ayungin shoal idi Hunio 17 iti daytoy a tawen a nagresulta iti pannakadadael dagiti alikamen ti naval ti Pilipinas ken pannakadangran ti sumagmamano a Navy personnel a pakairamanan ni Seaman First Class Jeffrey Facundo.
Segun kenni Chinese Foreign Affairs Ministry Spokesperson Mao Ning, rumbeng a sanguen ti Armed Forces of the Philippines ti pagbanagan iti bukod da nga aramid.
Saytoy ti inpablaak ti opisyal ti China kalpasan a kiniddaw ti Philippine Armed Forces a mangisayangkat iti resupply and rotation mission iti BRP Sierra Madre outpost iti Ayungin shoal ti 60 a million a pisos a kompensasion kadagiti danyos a sinagrap ti Pilipinas iti nasao nga insidente.
Nupay kasta, saan a sinungbatan ti opisial ti China no agbayad wenno saan ti China iti nasao a gatad ti danyos, no di ket inpetteng na a ti insayangkat ti Pilipinas a resupply missions iti BRP Sierra Madre ket illegal ken maipagarup a maikontra iti territorial waters-da gapu ta patien da a nangrugi daytoy iti provocation.
Innayonna a ti pananglapped ti Chinese Coast Guard iti daytoy ket depensa da iti kinasoberano ti pagilianda.
Ngem immun-unan nga impakaammo ti Department of Foreign Affairs (DFA) a ti Ayungin shoal ket 423.30 nautical miles manipud iti Paracels ken 617.39 nautical miles manipud iti China mainland, isu a nalawag a nalablabes ngem ti 200 nautical miles maximum tapno maibilang a sanikuada daytoy wenno makuna nga adda iti uneg ti exclusive economic zone-da iti sidong ti United Nations Convention on the Law of the Sea.
Isu nga awan ti karbengan ti China a mangipeksa iti kinasoberanona iti nakaiwayatan ti resupply mission.
