LAOAG CITY – Nagballigi ti nagtipon a pwersa ti Philippine National Police iti ili ti Piddig ken ti Ilocos Norte Police Provincial Office a nangtiliw iti dua a mannalon iti nasao nga ili gapu iti panaglabsing da iti Republic Act 10591 wenno Comprehensive Firearms and Ammunition Law.
Nabigbig dagitoy nga isuda Jovencio Tolentino, agtawen ti 52, mannalon, ken ni Arthur Tolentino, agtawen ti 50, agpada dagitoy a residente iti Barangay Estancia iti ili ti Piddig.
Iti pannakaiserbi ti immuna a search warrant iti balay ni Jovencio ket negatibo ti resulta na, idinto a ti maikadwa a search warrant no sadinno a ti nailanad a sukimaten dagiti otoridad ket iti stockroom ken kusina ket ditoyen a nakumpirkar dagiti otoridad ti maysa a beltbag a naglaon ti maysa a kalibre 38 a paltog nga addaan ti tallo a bala, brown sling bag nga adda karga na nga uppat a bala para iti12 gauge shotgun, ken adda pay ti nakita nga uppat a bala ti 12 guage shotgun iti bamboo basket.
Kabayatanna, iti met pannakaiserbi ti search warrant iti balay ni Arthur ket nakakumpiskar dagiti otoridad ti bala ti 12 gauge shotgun.
Iti agdama, maisagsaganan ti kaso a maipila kontra kadagiti dua a mannalon.
