LAOAG CITY – Balligi ti pannakaisayangkat ti search warrant operation iti Brgy. 7-B, Nuestra Seniora de Natividad partikular iti paset ti Panganiban St. ditoy ciudad ti Laoag.
Nabigbig ti subject nga agkasangay inton bigat a ni Allen Ventura, agtawen ti 39, maysa a construction worker, addaan ti live in partner ken residente iti nasao a Barangay.
Nabirukan dagiti otoridad ti maysa Caliber 38 a paltog ken uppat a bala a naibungon iti panyo nga agmaris ti nalabbaga nga adda iti sirok ti lamisaan a pangikabkabilan da kadagiti sapatos.
Malaksid iti daytoy, nasapulan pay dagiti otoridad ti maysa a bala ti Caliber 22 a paltog nga adda iti pouch.
Mainaig iti daytoy, segun ken ni Police Major Christian Felix, ti Deputy Chief of Police ti PNP Laoag, adda ti impormasion kadakuada nga us-usaren ti subject a pangkarit ti nasao a paltog no adda iti impluwensiya ti nasanger.
Kunana nga awan met ti maipakita ti subject a lisensia wenno aniaman a dokumento a mangipaneknek a legal daytoy nga agikot ti paltog.
Inpalgak na nga addan ti makabulan a sipsiputan da ti garaw ti subject.
Mainaig iti daytoy, kuna met ni Brgy. Chairman Joey Agliam nga awan met pay ti naaw-awat da a report nga agik-ikot ti paltog ti subject.
Kabayatanna, naiget met a naglikudan ti subject a kukuana ti paltog ken balbala a naala iti pagtaengan na.
Innayon na a masdaaw no apay nga adda ti paltog ken balbala gapu ta awan met daytoy idi nagdalus ken nagurnos kadagiti kagamitan iti pagtaengan da.
