LAOAG CITY – Inpetteng ti Alliance of Concerned Teachers (ACT) nga awan ti serserbina dagiti pammadayaw ken kari nga iprayoridad iti edukasyon ni Presidente Ferdinand Marcos Jr. no saanna a buyugan ti kongreto nga addang kas ti panangipangato ti sweldo dagiti mangisursuro iti pampubliko a pagadalan ti P50,000.
Daytoy ti nagbalin a sungbat ti Alliance of Concerned Teachers iti nagbalin a rakurak ni Presidente Marcos Jr. iti “RISE in Service” oath-taking ceremony iti babaen ti Expanded Career Progression program, no sadinno a binigbig na ti sakripisyo ken kadagsen ti responsibilidad dagiti mangisursuro iti uneg ken ruwar ti pagadalan.
Segun ken ni Alliance of Concerned Teachers Chairperson Ruby Bernardo, nabayagen a mangmangged dagiti mangisursuro dagiti kastoy a pammadayaw ngem nagtalinaed a nababa ti sweldo da.
Innayon na a nupay ti kadakkelan a paset ti 2026 national budget ket para iti edukasyon, nagtalinaed a saan a makaumanay ti pagibasar ti sweldo dagiti mangisursuro tapno makagiddan iti ngumatngato a paggastosan, isut gapuna nga ado dagiti mangnamnama iti utang.
Nagpanawagan ti Alliance of Concerned Teachers ken ni Presidente nga ipakita ti pudno a panangisakit iti babaen ti panangaprubar iti naiungalong a P50,000 entry-level salary, kas ti naipaay idi kadagiti pulis ken dadduma pay nga uniformed personnel.
