LAOAG CITY – Maipalubosen a dumalyasat dagiti public vehicle kas iti jeep ken tricycle iti kaluklukat nga alternative road nga agturong iti dakkel a mall ditoy ciudad ti Laoag.
Daytoy ti inpakaammo ni Mayor James Bryan Alcid kalpasan nga adda dagiti reklamo a naipadanon iti opisina na a panakaipawil a dumalan ti tricycle iti nasao a dalan.
Kuna ti mayor nga apaman a naamoan na daytoy a banag ket insigida a nakikoordinar iti management ti Mall tapno makasarita dagitoy ken ammoen dagiti wagas a mabalin da nga aramiden tapno masolusyonan daytoy.
Inlawlawag ti mayor a ti nagbalin a rason no apay saan nga inpalubos ti Mall a dumalyasat dagiti a public vehicle ket gapo ta saan da kayat nga adda dagiti lugan nga agkaiwara iti bisinidad ti mall nga agpick up kadagiti pasaheros aglalo ket adda ti naidesignar pangikargaan da.
Gapo iti daytoy, inbatad ti mayor a napagnunomoan ti city government ken ti mall nga ipalubos laengen ti panagdalyasat dagiti tricycle ngem mapan da laeng agi-drop off kadagiti pasaheros da ken maipawil ti panagkarga.
Ummunan nga inlawlawag ti lokal a gobierno a ti gagem ti gobierno iti panakaestbalisar ti alternative road ket tapno makissayan ti nairot a trapiko ditoy ciudad.
