LAOAG CITY – Inrakurak ni Vice President Sara Duterte a nabayag ti tignay ni Presidente Ferdinand Marcos Jr. ken saanna nga ammo ti aramidenna iti sango ti dakkel nga isyu ti korapsion iti flood control projects ken kontrobersia iti budget.
Reaksion daytoy ti Bise Presidente mainaig iti Independent Commission on Infrastructure a binukel ni Marcos tapno imbestigaran ti maanomalya a flood control projects.
Inbatad ni Vice President Sara nga awan ti serserbina iti panangbukel ti independent commission no agtalinaed iti puesto ni House Speaker Ferdinand Martin Romualdez nga addaan ti reklamo wenno kaso met idi a sangsangoen idiay Amerika.
Inpettengna a nasken a saan a binaybay-an ni Marcos a mangidaulo iti Kamara ti kapada ni Romualdez.
Innayonna a masapul nga ikkatenen ti Presidente ni Speaker Romualdez, urnosen dagiti kaalyado iti Kamara, pagsungbaten wenno ipadalan iti lifestyle check dagiti kongresista pakairamanan dagiti staff.
