LAOAG CITY – Inpakaammo ni Dr. Alan Taylan, ti maysa nga Health Practitioner iti Internal Medicine ti St. Camilus De Lellis Hospital ditoy siudad ti Laoag a ti panangidonar ti organ ket maysa a wagas a mangsilpo iti biag ti maysa a pasiente.
Segun kenkuana, ti panagidonar ti organ ket dakkel a tulong para kadagiti pasiente nga agsagsagaba ti nagduduma a sakit kas ti kidney problem.
Inbatadna a naruay dagiti pasiente ti agkasapulan ti organ transplant ngem agkurkurang ti organ a mausar iti pannakaipadalan dagitoy iti transplant.
Kunana a posible a maiyakar ti organ iti maysa nga indibidual a natay gapu iti desgrasia laketdi adda ti pagpadaanda iti maseknan a pasiente ken dumalanda iti umiso a proseso para iti ballaigi nga operasion.
Inlawlawagna nga adda met ti maaramid a katulagan no sadino adda ti panagpirma ti pamilia ti organ donor kas pammaneknek a dagitoy ket nangted ti pammalubos a maidonar ti organ ti pimmusay nga ay-ayatenda iti biag.
Innayonna a masapol latta ti naiget a pannakamonitor iti pasiente apaman a malpas ti operasion tapno saan a maapektaran ti salun-at daytoy.
