LAOAG CITY – Mangrugin inton Lunes, Pebrero 23 ti panangkumpirmar kadagiti kaso ni dati a Presidente Rodrigo Duterte iti International Criminal Court (ICC) idiay The Hague, Netherlands.
Basar iti website ti International Criminal Court, ti “confirmation of charges” ket manipud iti 10:00 ti bigat agingga iti 3:00 ti malem, oras iti The Hague wenno 5:00 ti malem agingga iti 10:00 ti rabii ditoy Pilipinas iti Pre-Trial Chamber I iti Courtroom I.
Naammoan a dagiti sumaruno a panagdengngeg ket inton Pebrero 24 (Martes), 26 (Huebes) ken 27 (Biernes).
Idatag ti prosekusion, ti depensa ken dagiti abugado dagiti biktima kadagiti argumento dagitoy kadagiti hues.
Ti prosekusion ket maikkan ti 30 a minuto para kadagiti pakpakauna a salaysay, 2 nga oras ken 30 a minuto iti panangisubmitir kadagiti merito ken 30 a minuto iti pangmaudi a salaysay.
Ti Common legal representatives of the victims (CLRV) ket maikkan met ti 30 a minuto para iti pakpakauna a salaysay, 1 nga oras ken 30 a minuto iti panangisubmitir iti merito ken 30 a minuto iti pangmaudi a salaysay.
Kabayatanna, ti depensa ket addaan ti 30 a minuto iti pakpakauna a salaysay, 3 nga oras ken 30 a minuto iti panangisubmitir iti merito ken 30 a minuto iti pangmaudi a salaysay.
Inrakurak ti International Criminal Court a mabalin nga agbaliw ti schedule no kasapulan depende iti pannakaiproseso ti proceedings.
