LAOAG CITY – Awan pay ti pinal a desision ni Presidente Ferdinand Marcos Jr., mainaig iti panangimbitar ni United States President Donald Trump nga agbalin a paset ti baro nga inisyatibo a “Board of Peace.”
Inbatad ni Palace Press Officer Undersecretary Claire Castro, naiget nga ad-adalen pay laeng ti Presidente ti nasao a banag.
Inlawlawagna a mangipaayto lattan ti abiso ti Malacañang apaman nga addan ti nalawag a desision ti Presidente.
Ti Board of Peace ket maysa nga international advisory body a gagem nga ilungalong ti diplomasia ken nakappia a resolusion dagiti riribuk kadagiti nagduduma a paset iti intero a lubong partikular iti Gaza strip.
Inpasigurado ti Malacañang nga aniaman nga addang ti Presidente ket dumalan iti konsultasion ken nakasentro iti nailian nga interes ken maipatpatungpal a pagannurotan iti ruar ti Pilipinas.
