LAOAG CITY – Kinumpirmaran ti Malacañang a naikeddeng a mangiyuswat ni Presidente Ferdinand Marcos Jr. ti maysa a working visit idiay New York, United States of America manipod Marso 8-11, 2026.
Segun ken ni Presidential Communications Office (PCO) Undersecretary ken Palace Press Officer Claire Castro, agatendar ni Presidente Marcos iti panaglukat ti maika-70 a sesyon ti Commission on the Status of Women (CSW).
Naikeddeng pay a mangipaay ti mensahe ni Presidente Marcos iti maisayangkat nga special session ti United Nations General Assembly (UNGA).
Inrakurak pay ni Castro a makitaripnong met ni Presidente Marcos iti dadduma nga opisyal ti United Nations iti panagbisita na idiay Amerika.
Ti Commission on the Status of Women ket maysa nga United Nations commission nga agserserbi a kangrunaan world intergovernmental body a nakatutuk iti panangilungalong ti gender equality, karbengan dagiti babbi ken empowerment wenno panangpapigsa iti sektor dagiti babbai.
Saan met a nadakamat ni Castro no maaddaan ti taripnong ni Presidente Marcos ken ni US President Donald Trump.
