LAOAG CITY – Inlawlawag ni Police Colonel Frederick Obar, ti Provincial Director iti Ilocos Norte Police Provincial Office no apay adda dagiti masansan a masukatan wenno mareliboan nga Hepe kadagiti nagduduma nga ili ken siudad ditoy probinsia.
Segun kenkuana, dagiti kangrunaan a mareliboan nga Hepe ket nakadepende met laeng iti pammilin wenno desision ti maseknan a Local Chief Executive.
Inbatadna nga adda ti bileg wenno karbengan dagiti Mayor a mangpili wenno mangsukat kadagiti Hepe nga agtugaw iti area of responsibility dagitoy.
Inlawlawagna a dagiti met Hepe a nagtalinaed iti napaut a tawen ket maibilang a napintas ti performance-da kabayatan ti panagserbida iti maysa a lugar.
Kunana a no makita met ti Ilocos Norte Police Provincial Office a saan a napintas ti panangidaulo iti serbisio ti naipatugaw nga Hepe ket adda ti karebbenganda a mareliboan dagitoy.
Innayonna a dagiti nagsisinnukat nga Hepe ket adda ti koordinasion iti nagbaetan ti Local Chief Executive ken iti Ilocos Norte Police Provincial Office.
